(روز نامہ قدس ۔آنلائن خبر رساں ادارہ) قابض غیر قانونی صیہونی ریاست اسرائیل نے شمالی مغربی کنارے میں نور شمس اور طولکرم کے مہاجر کیمپوں پر اپنے حملے کو وسعت دے دی ہے، مغربی کنارے میں اسرائیلی دہشتگردی مسلسل 21ویں روز بھی جاری ہے۔
فلسطینی ذرائع ابلاغ کے مطابق، غیر قانونی صیہونی ریاست اسرائیل کی افواج نے طولکرم شہر اور اس کے مہاجر کیمپوں میں مزید فوجی کمک داخل کی ہے۔ یہ کمک مغرب کی جانب "تسنعوز” فوجی چوکی کے ذریعے آئی ہے، جبکہ قابض فوجی اہلکار شہر کی گلیوں، خاص طور پر شمالی اور مشرقی محلوں میں گشت کر رہے ہیں اور عام شہریوں اور گاڑیوں کی نقل و حرکت میں رکاوٹ ڈال رہے ہیں۔
سرکاری فلسطینی خبر رساں ایجنسی "وفا” کے مطابق، غیر قانونی صیہونی ریاست اسرائیل کی فورسز نابلس شاہراہ پر موجود ہیں، جو طولکرم اور نور شمس کے مہاجر کیمپوں کو ملاتی ہے۔ وہاں انہوں نے گاڑیوں کو روک کر ان کی تلاشی لی، مسافروں کے شناختی کارڈ چیک کیے اور انہیں پوچھ گچھ کے لیے روکا۔ اس دوران، قابض فوج نے فلسطینیوں پر تشدد کیا۔
فلسطینی ہلال احمر سوسائٹی نے اطلاع دی کہ طولکرم میں غیر قانونی صیہونی ریاست اسرائیل کی فورسز کے تشدد سے ایک شہری زخمی ہوا، جسے شہید ثابت سرکاری اسپتال منتقل کیا گیا۔
قابض فورسز نے طولکرم کے مشرقی اور شمالی محلوں میں کئی گھروں پر قبضہ کر لیا، خاص طور پر ان گھروں پر جو مہاجر کیمپ کے قریب واقع ہیں۔ انہوں نے رہائشیوں کو زبردستی گھروں سے نکال کر انہیں فوجی چھاؤنیوں میں تبدیل کر دیا۔
دریں اثنا، غیر قانونی صیہونی ریاست اسرائیل کے فوجیوں کی جانب سے شہریوں کے گھروں کو ناپاک کرنے اور ان میں توڑ پھوڑ کی تصاویر سامنے آئی ہیں، جن میں مقدس قرآن کے نسخوں کو بے حرمتی کے ساتھ پھاڑا گیا۔
اسی دوران، قابض فوج کی بلڈوزروں نے مہاجر کیمپوں میں تباہی اور کھدائی کا عمل جاری رکھا، جس میں پانی، بجلی، نکاسی آب اور ٹیلی کمیونیکیشن کے نظام کو بھی نشانہ بنایا گیا۔ اس دوران، علاقے میں شدید فائرنگ اور زوردار دھماکوں کی آوازیں بھی سنائی دیں۔
دوسری جانب، "جنین بریگیڈ” نے شہر میں داخل ہونے والی قابض فورسز کو نشانہ بنانے کا سلسلہ جاری رکھا ہے اور صبح کے وقت السیلہ الحارثیہ کے علاقے میں غیر قانونی صیہونی ریاست اسرائیل کی بکتر بند گاڑیوں پر بم دھماکے کیے۔
اس کے علاوہ، ہفتے کی شام غیر قانونی صیہونی ریاست اسرائیل کی فوج نے جنین کے جنوبی علاقے عرابہ سے ایک نوجوان کو گرفتار کر لیا۔
مقامی ذرائع کے مطابق، قابض فوج نے عرابہ میں داخل ہو کر اپنی بکتر بند گاڑیاں تعینات کیں اور نوجوان احمد فراسینی کو گرفتار کر لیا، جس کے نتیجے میں علاقے میں شدید جھڑپیں ہوئیں۔
جنین گورنری، خاص طور پر شہر اور اس کے مہاجر کیمپ، 21 جنوری سے غیر قانونی صیہونی ریاست اسرائیل کے بے مثال جارحیت کا سامنا کر رہے ہیں۔