مقبوضہ بیت المقدس (فلسطین نیوز۔مرکز اطلاعات) اسرائیل کے عبرانی اخبارات کے مطابق غزہ کی پٹی کے علاقے سے فلسطینی مظاہرین کی جانب سے سرحد کی دوسری جانب آتش گیر کاغذی جہازوں کے پھینکے جانے کا سلسلہ جاری ہے۔
فلسطین نیوز کو موصول ہونے والی اطلاعات کے مطابق اسرائیلی اخبار ‘یدیعوت احرونوت’ کی رپورٹ میں بتایا گیا ہے کہ یہودیوں کی ‘عیدالعرش’ کے 10 دنوں میں غزہ کی پٹی میں مظاہرین کی جانب سے کاغذی جہازوں اور آتش گیر مواد پر مشتمل گیسی غباروں کے حملوں کا سلسلہ جاری رہا۔ عید کے ایام میں غزہ کے اطراف میں 70 مقامات پر آتش زدگی کے واقعات پیش آئے۔عبرانی ویب سائیٹ ‘0404’ کے مطابق فلسطینیوں کے آتش گیرکاغذی جہازوں سے غزہ کے اطراف میں ‘بئیری’، ‘ کیسوفیم’، مفلاسیم میں آگ لگائی گئی۔ آتش گیر کاغذی جہازوں سے صیہونی آباد کاروں کے گھروں ، فصلوں اور دیگر املاک کو شدید نقصان پہنچا۔