مقبوضہ بیت المقدس (فلسطین نیوز۔مرکز اطلاعات) اسرائیل کے وزیر برائے داخلہ سلامتی گیلاد اردان نے اسلامی تحریک مزاحمت (حماس) کی پوری قیادت کو شہید کرنے کی دھمکی دی ہے۔
فلسطین نیوز کو موصول ہونے والی اطلاعات کے مطابق اسرائیلی وزیر کی طرف سے یہ دھمکی آمیز بیان گذشتہ روز سامنے آیا۔ انہوں نے کہا کہ اگر غزہ کی مشرقی سرحد پر فلسطینیوں کے حق واپسی کے لیے پر تشدد مظاہرے دوبارہ شروع ہوتے ہیں تو حماس کی پوری قیادت کو شہید کیا جا سکتا ہے۔عبرانی ٹی وی پر نشر بیان میں گیلاد اردان کا کہنا تھا کہ اگر غزہ کی سرحد پر کشیدگی بڑھتی ہے تو اس کی ذمہ داری حماس پر عائد کی جائے گی۔ ایسی صورت میں ہماری فوج حماس کی قیادت کو قاتلانہ حملوں میں شہید کرنے کی پالیسی دوبارہ اختیار کرسکتی ہے۔
ادھر اسرائیلی کنیسٹ کے ایک رکن حاییم یلین نے حال ہی میں فوج سے مطالبہ کیا ہے کہ وہ حماس کو غزہ میں جنگ بندی معاہدے پر مجبور کرنے کے لیے حماس کے عسکری ونگ عزالدین القسام بریگیڈ کی قیادت کو ٹارگٹ کلنگ کانشانہ بنانا شروع کرے۔