طوباس (فلسطین نیوز۔مرکز اطلاعات) صیہونی فوج نے فلسطین کے مقبوضہ مغربی کنارے کے شمالی شہر طوباس کے جنوب مشرقی الراس الاحمر کے مقام پر فلسطینیوں کی 1080دونم اراضی پر قبضہ کرلیا۔
فلسطین نیوز کو موصول ہونے والی اطلاعات کے مطابق مقامی فلسطینی سماجی کارکن اور طوباس گورنری کے عہدیدار معتز بشارات نے بتایا کہ صیہونی فوج نے فلسطینیوں کے 15 قطعہ اراضی پر قبضہ کرلیا۔ ان میں سے پانچ پلاٹ سرکاری لینڈ ریکارڈ’طابو‘ میں بھی فلسطینیوں کے مالکانہ حقوق کے ساتھ درج ہیں۔خیال رہے کہ راس الاحمر کا 98 ہزار دونم کا علاقہ اسرائیلی فوج قبضے میں چاہتی ہے۔ دو ماہ قبل صیہونی فوج نے اسی علاقے میں 68 دونم کےعلاقے پر قبضہ کرلیا تھا۔
خیال رہے کہ دونم (dunam) سلطنت عثمانیہ کے دور میں زمینی رقبہ ماپنے کے لیے ایک پیمائشی اکائی تھی، جوایک دن میں جوتی جا سکنے والی زمین کی نمائندگی کرتی تھی۔ اس کی قانونی تعریف "لمبائی اور چوڑائی میں چالیس معیاری قدم” تھی، لیکن مختلف مقامات پر یہ مختلف تھی عام طور پر یہ 900-2500 میٹرمربع کے درمیان میں ہوتی تھی۔