نابلس (فلسطین نیوز۔مرکز اطلاعات) فلسطین کے مقبوضہ مغربی کنارے اور بیت المقدس میں بدھ کو اسرائیلی فوج نے گھر گھر تلاشی کی کارروائیوں اور چھاپوں میں 27 فلسطینیوں کو حراست میں لے لیا۔ گرفتار کیے جانے والوں میں تحریک حماس کے کارکن اور سابق اسیران شامل ہیں۔
فلسطین نیوز کو موصول ہونے والی اطلاعات کے مطابق اسرائیلی فوج کی طرف سے جاری ہونے والے ایک بیان میں کہا گیا ہے کہ تلاشی کے دوران 27 فلسطینیوں کو گرفتار کیا گیا ہے۔ ان میں سے بعض فلسطینی اسرائیل کے خلاف مزاحمتی سرگرمیوں میں ملوث رہےہیں۔اسرائیلی فوج نے دعویٰ کیا ہے کہ تلاشی کے دوران اسلحہ بھی برآمد کیا گیا ہے۔ رام اللہ کے نواحی علاقے بیت ریما میں سے دستی ساختہ بم بھی برآمد کیا گیا ہے۔
نابلس سے تلاشی کے دوران 21 سالہ براء عصام ریحان اور عالمود سے حمزہ طبنجہ کو حراست میں لیا گیا۔
اسرائیلی فوج نے بیت دجن سے اسکول معلم فاروق عبیسی، عسکر کیمپ سے احمد ابو غلیون، احمد سلمان سمحانÂ الخلیل سے حماس رہ نما عرفات ابراہیم القواسمی اور متعدد دیگر فلسطینیوں کو حراست میں لے لیا۔
الخلیل میں اسرائیلی فوج اور فلسطینیوں کے درمیان تصادم کی اطلاعات ہیں۔ جھڑپوں کے دوران فلسطینی شہریوں نے سنگ باری کی جب کہ اس کے جواب میں اسرائیلی فوج نے فلسطینیوں دھاتی گولیوں کا استعمال کیا۔ عینی شاہدین کا کہناہے کہ اسرائیلی فوجی گھروں کے دروازے توڑ کر گھروں میں داخل ہوئے اور خواتین اور بچوں کو زدو کوب کیا۔
جنین شہر میں تلاشی کے دوران اسرائیلی فوج نے متعدد فلسطینیوں کو حراست میں لینے کے بعد نامعلوم مقام پر منتقل کردیا۔