نابلس (فلسطین نیوز۔مرکز اطلاعات) غرب اردن کے شمالی شہر نابلس میں اسرائیلی فوج نے حضرت یوسف کے مزار پر صیہونیوں کے دھاوا بولنے سے قبل فلسطینیوں کو تشدد کا نشانہ بنایا جس کے نتیجے میں 5 فلسطینی زخمی ہوگئے۔
فلسطین نیوز کو موصول ہونے والی اطلاعات کے مطابق نابلس میں اسرائیلی فوج کے تشدد سے پانچ فلسطینی زخمی ہوگئے۔ زخمیوں میں سے دو کو رفیدیا اسپتال منتقل کیا گیا ہے۔ ان میں سے ایک کے جبڑے پر گولی لگی ہے اور اس کی حالت خطرے میں بتائی جاتی ہے۔ اسے ایمرجنسی وارڈ میں منتقل کردیا گیا ہے۔ دوسرا فلسطینی پنڈلی میں گولی لگنے سے زخمی ہوا ہے۔عینی شاہدین نے بتایا کہ 20 صیہونی فوجی نابلس میں جبل جرزیم کے قریب الضاحیہ کالونی میں داخل ہوئے۔ اس کے بعد صیہونی آباد کاروں اور اسرائیلی فوجیوں کی بھاری نفری نے دھاوا بولا اور فلسطینی شہریوں کو بھی تشدد کا نشانہ بنایا۔