رام اللہ (فلسطین نیوز۔مرکز اطلاعات) اسرائیلی حکام نے فلسطین کے مقبوضہ مغربی کنارے کے وسطی شہر رام اللہ میں صیہونی کالونیوں عوفریم اور بیت اریہ کو باہم ملانے کے لیے ایک نئی سڑک کی تعمیر کی منظوری دے دی ہے۔ یہ سڑک فلسطینی سرکاری اور نجی اراضی پرغاصبانہ قبضے کے بعد تعمیر کی جائے گی۔
فلسطین نیوز کو موصول ہونے والی اطلاعات کے مطابق اسرائیلی حکام نے رواں ماہ جولائی میں رام اللہ میں اللبن، عابود اور مغربی رام اللہ میں 324 ایکڑ فلسطینی اراضی غصب کرنے کے بعد فوری طور پر اس پر سڑک کی تعمیر کا اعلان کیا تھا۔مقامی فلسطینیوں کا کہنا ہے کہ یہ سڑک صرف صیہونی کالونیوں کو باہم مربوط بنانے اور فلسطینی اراضی غصب کرنے کے لیے تعمیر کی جا رہی ہے۔ مقامی شہریوں کا کہنا ہے کہ انہیں خدشہ ہے کہ اسرائیلی حکومت سڑک کی تعمیر کے بعد اس کے اطراف میں فلسطینی اراضی غصب کرکے مزید صیہونی کالونیاں بھی تعمیر کرے گی۔