فلسطین نیوز کو موصول ہونے والی اطلاعات کے مطابق غزہ کی مشرقی سرحد پر تحریک حق واپسی کے مظاہرین سے خطاب میں ڈاکٹر محمود الزھار نے کہا کہ مسئلہ فلسطین کے حل کے لیے نام نہاد امن بات چیت کا ڈرامہ فلاپ ہوچکا ہے۔
انہوں نے کہا کہ فلسطینی قوم کسی صدی کی ڈیل کی سازش کو قبول نہیں کرے گی۔ ہماری لغت میں صدی کی ڈیل یا دو صدیوں کی ڈیل کا کوئی تصور نہیں۔ قضیہ فلسطین کو نوچنے اور چیر پھاڑ کرنے کی ہرگز کسی کو اجازت نہیں دی جائے گی۔
ڈاکٹر محمود الزھار نے فلسطین میں آباد کیے گئے صیہونیوں کو مخاطب کرتے ہوئے کہا کہ وہ فلسطین سے نکل جائیں۔
حماس رہنما کا کہنا تھا کہ زندہ قومیں نہ دھوکہ کھاتی ہیں، نہ بکتی ہیں اور نہ ہی خریدی جاسکتی ہیں۔ اپنی سرزمین اور قربانیوں کو فراموش کرنے والی قوموں کا کوئی مستقبل نہیں ہوتا۔ فلسطینی قوم اپنی سرزمین اور قربانیوں کو کبھی فراموش نہیں کرے گی۔