مقبوضہ بیت المقدس (فلسطین نیوز۔مرکز اطلاعات) اسرائیلی پولیس نے بدمعاشی اورمذہبی غنڈہ گردی کا مظاہرہ کرتے ہوئے بیت المقدس کی ایک سرکردہ سماجی کارکن کو دو ہفتے کے لیے مسجد اقصیٰ سے بے دخل کردیا ہے۔
فلسطین نیوز کو موصول ہونے والی اطلاعات کے مطابق فلسطینی قانون دان خالد زبارقہ نے بتایا کہ اسرائیلی پولیس نے دعویٰ کیا ہے کہ فلسطینی خاتون کو ’باب الرحمۃ‘ کے مقام پر پایا گیا۔ اسرائیلی فوج اور پولیس نے اس جگہ کو فلسطینیوں کے داخلے کے لیے ممنوع قرار دے رکھا ہے۔باب الرحمۃ کے مقام پر کھڑے ہونے کی پاداش میں القدس کی رہائشی سماح غزاوی کو پندرہ دن کے لیے قبلہ اوّل سے بے دخل کردیا گیا۔
عینی شاہدین نے بتایا کہ اسرائیلی پولیس نے سماح غزاوی کو مسجد اقصیٰ کے باب الاسباط سے باہر نکلتے ہوئے حراست میں لے لیا تھا۔ بعد ازاں اسے القشلہ پولیس مرکزمنتقل کردیا گیا جہاں اسے ایک نوٹس دیا گیا جس پر اسے مسجد اقصیٰ میں پندرہ دن تک داخل ہونے پر پابندی کےاحکامات عائد کیے گئے تھے۔