مقبوضہ بیت المقدس (فلسطین نیوز۔مرکز اطلاعات) اسرائیلی فوج نے مقبوضہ بیت المقدس سے تعلق رکھنے والے چھ فلسطینیوں کو حراست میں لیا ہے۔ان پر الزام ہے کہ انہوں نے اسلامی تحریک مزاحمت (حماس) کا پرچم مسجد اقصیٰ پر لہرانے کی کوشش کی تھی۔
فلسطین نیوز کو موصول ہونے والی اطلاعات کے مطابق اسرائیلی پولیس کی طرف سے جاری کردہ ایک بیان میں کہا گیا ہے کہ دوسرے جمعہ کے روز القدس سے تعلق رکھنے والے چھ فلسطینیوں کو ایک حراستی مرکز طلب کیا گیا۔ ان پر کار سرکار میں مداخلت کرنے،امن وامان کے نظام میں خلل ڈالنے اور حماس کا پرچم مسجد اقصیٰ پرلہرانے کے الزامات کے بعد گرفتار کیا گیا۔اسرائیلی پولیس کا کہنا ہے کہ انہوں نے تلاشی کے دوران ان فلسطینیوں کے گھروں سے حماس کا لیٹریچر اور جھنڈے بھی برآمد کیے ہیں۔ انہیں تفتیش کے لیے نامعلوم مقام پرمنتقل کردیا گیاہے۔ مقامی فلسطینی ذرائع نے گرفتار فلسطینیوں کی شناخت مامون الرازم، عمروابو عرفہ، عامر البازلمیط، محمد الطویل، سامر ابو الحلاوہ اور اکرم الشرفا کے ناموں سے کی ہے۔