مقبوضہ بیت المقدس (فلسطین نیوز۔مرکز اطلاعات) اسرائیلی ذرائع ابلاغ نے انکشاف کیا ہے کہ حکومت نے مقبوضہ مغربی کنارے کی صیہونی کالونیوں میں مزید ہزاروں کی تعداد میں مکانات کی تعمیر کے لیے ٹینڈر جاری کرنے کی اجازت دی ہے۔
فلسطین نیوز کو موصول ہونے والی اطلاعات کے مطابق عبرانی زبان میں نشریات پیش کرنے والے ٹی وی 14 کے نامہ نگار باراک رافید نے بتایا کہ وزیر دفاع اور سول ایڈ منسٹریشن کی پلاننگ کونسل نے متفقہ طورپر غرب اردن کی صیہونی کالونیوں میں مزید 2500 گھروں کی تعمیر کی منظوری دی ہے۔رپورٹ میں بتایا گیا ہےکہ حکومت نے ان گھروں کی تعمیر کے لیے آئندہ ہفتے کام شروع کرنے کی اجازت دی ہے۔
خیال رہے کہ صیہونی حکومت امریکا کی کھلی سرپرستی میں مقبوضہ مغربی کنارے اور بیت المقدس میں صیہونی آباد کاری اور توسیع پسندی کی پالیسی پرعمل پیرا ہے۔ امریکا میں ڈونلڈ ٹرمپ کے صدر منتخب ہونے کے بعد اسرائیلی حکومت نے صیہونی آباد کاری اور توسیع پسندی میں مزید اضافہ کردیا ہے۔