غزہ (فلسطین نیوز۔مرکز اطلاعات) فلسطینی وزارت صحت کے مطابق مشرقی غزہ میں احتجاجی مظاہروں کے دوران اسرائیلی فوج کی فائرنگ سے زخمی ہونے والے 23 فلسطینی شہریوں کو علاج کے لیے اردن منتقل کیا گیا ہے۔
فلسطین نیوز کو موصول ہونے والی اطلاعات کے مطابق غزہ میں اردن کے فیلڈ اسپتال کے سربراہ سلیمان الھلالات نے بتایا کہ غزہ سے 23 فلسطینی زخمیوں کو ایمبولینسوں کی مدد سے غرب اردن اور وہاں سے اردن کی فراہم کردہ ایمبولینسوں سے اردن لے جایا گیا ہے۔انہوں نے بتایا کہ غزہ سے دو درجن زخمیوں کو علاج کے لیے اردنی فرمانروا شاہ عبداللہ دوم کی ہدایت پر عمان لے جایا گیا ہے۔
ادھرغزہ میں زخمیوں کے علاج کے لیے آنے والے اردنی طبی گروپ کے سربراہ عمر الزعبی نے بتایا کہ اردن کی جانب سے غزہ میں زخمی مظاہرین کو طبی امداد کی فراہمی کا سلسلہ جاری رکھا جائے گا۔
خیال رہے کہ 30 مارچ کے بعد سے غزہ کی مشرقی سرحد پر عظیم الشان حق واپسی تحریک کے دوران اسرائیلی فوج کی ریاستی دہش گردی میں 118 فلسطینی شہید اور 13 ہزار زخمی ہوچکے ہیں۔ ان میں سے 300 زخمیوں کی حالت بدستور تشویشناک ہے۔