مقبوضہ بیت المقدس (فلسطین نیوز۔مرکز اطلاعات) مقبوضہ بیت المقدس میں مسجد اقصیٰ سے متصل تاریخی قبرستان ’الرحمۃ‘ ان تاریخی قبرستانوں میں سے ایک ہے جس میں جلیل القدر صحابہ کرام اور دیگر بزرگان دین کی بڑی تعداد آسودہ خاک ہے۔ اسی طرح یہ قبرستان بھی دیگر فلسطینی قبرستاں کی طرح منظم صیہونی مہم کا سامنا کررہا ہے۔ اس قبرستان کی بے حرمتی، قبروں کی اکھاڑ پچھاڑ اور اس کی اراضی پرغاصبہ قبضے کے واقعات روز کا معمول بن چکے ہیں۔
فلسطین نیوز کو موصول ہونے والی اطلاعات کے مطابق اسرائیل ’الرحمۃ‘ قبرستان کے وجود کو ختم کرکے اس کی اراضی اور بزرگان دین کی قبروں پر تفریحی پارک قائم کرنا چاہتا ہے۔ روزانہ اسرائیلی پولیس، فوج، انٹیلی جنس اداروں کے اہلکار،القدس کی اسرائیلی بلدیہ کے عہدیدار اور عام صیہونی آباد کار اس قبرستان میں گھس کر اس کی بے حرمتی کرتے اور اس پرغاصبانہ قبضے کی سازشیں کرتے ہیں۔