رام اللہ (فلسطین نیوز۔مرکز اطلاعات) صہیونی فوج نے ایک اور فلسطینی خاندان کو مکان سے محروم کردیا۔
فلسطین نیوز کو موصول ہونے والی اطلاعات کے مطابق اسرائیلی فوج نے فلسطین کے مقبوضہ مغربی کنارے کے وسطی شہر رام اللہ کے مغرب میں شقبا کے مقام پر بلڈوزر کی مدد سے فلسطینی شہری کا مکان مسمار کرڈالا۔
شقبا قصبے کے چیئرمین عدنان شلشل نے بتایا کہ صیہونی فوج کی بھاری نفری نے ایک زیرتعمیر مکان اور اس کے متصل دو دکانوں کو مسمار کرڈالا۔شلشل نے بتایا کہ مکان کی مسماری سے15 افراد متاثر ہوئے ہیں جن میں بیشتر خواتین اور بچے ہیں۔ جہاں مکان مسمار کیا گیا وہ انتظامی اور سیکیورٹی کے حوالے سے اسرائیلی فوج کے ماتحت ہے۔
خیال رہے کہ فلسطین کے مختلف شہروں میں اسرائیلی فوج کی طرف سے فلسطینیوں کے مکانات کی مسماری روز کا معمول بن چکی ہے۔