رام اللہ (فلسطین نیوز۔مرکز اطلاعات) فلسطین میں انسانی حقوق کے لیے کام کرنے والے اداروں کی طرف سے جاری کی گئی رپورٹ میں کہا گیا ہے کہ مارچ 2018ء کے دوران اسرائیلی فوج کی کریک ڈاؤن کی کارروائیوں میں 95 بچوں اور 13 خواتین سمیت 609 فلسطینی شہریوں کو حراست میں لے لیا گیا۔ 28 فروری 2018ء کو اسرائیلی زندانوں میں قید فلسطینیوں کی تعداد 6500 بتائی گئی ہے۔
فلسطین نیوز کو موصول ہونے والی اطلاعات کے مطابق محکمہ امور اسیران، کلب برائے اسیران، الضمیر فاؤنڈیشن برائے اسیران و انسانی حقوق اور المیزان مرکز برائے انسانی حقوق کی طرف سے جاری کی گئی رپورٹ میں کہا گیا ہے کہ اسرائیلی زندانوں میں قید خواتین کی تعداد 62 ہے جن میں سے 8 کم عمر بچیاں ہیں۔ اسی طرح صیہونی زندانوں میں 350 کم عمر بچے بھی پابند سلاسل ہیں۔دیگر اسیران میں 500 فلطسینیوں کو بغیر کسی جرم کے نام نہاد انتظامی قید کےتحت پابند سلاسل کیا گیا ہے۔ مارچ میں 81 فلسطینیوں کو انتظامی قید کی سزائیں دی گئیں۔
رپورٹ میں قیدیوں کو عقوبت خانوں میں دی جانے والی سزاؤں اور ان کے ساتھ برتے جانے والے غیر انسانی سلوک کی تفصیلات بھی شامل ہیں۔