قلقیلیہ (فلسطین نیوز۔مرکز اطلاعات) فلسطین کے مقبوضہ مغربی کنارے کے شمالی شہر قلقیلیہ میں ایک صیہونی آباد کار نے اپنی گاڑی اسکول سے آنے والے کم سن فلسطینی بچوں پر چڑھا دی جس کے نتیجے میں وہ تینوں شدید زخمی ہوگئے۔
فلسطین نیوز کو موصول ہونے والی اطلاعات کے مطابق جیت یونین کونسل کے چیئرمین عمر یامین نے بتایا کہ ایک صیہونی آباد کار نے جیت قصبے میں ایک پرائمری بوائز اسکول کے تین طلباء پر گاڑی چڑھا دی جس کے نتیجے میں تینوں زخمی ہوگئے۔ زخمی ہونے والے طلباء کی عمریں 10 اور 11 سال کے درمیان بتائی جاتی ہیں۔ان کا کہنا ہے کہ زخمی طلباء کو علاج کے لیے نابلس کے ایک مقامی اسپتال منتقل کردیا گیا ہے جہاں ان کی حالت خطرے سے باہر بیان کی جاتی ہے۔
جائے وقوعہ پر اسرائیلی فوج پہنچ گئی تھی مگر اس کے باوجود اس نے اسرائیلی کار ڈرائیور کو کچھ نہیں کہا اور وہ بہ حفاظت وہاں سے فرار ہوگیا۔