مقبوضہ بیت المقدس (فلسطین نیوز۔مرکز اطلاعات) جرمنی اسرائیل سے جنگی مقاصد کے لیے بغیر پائلٹ کے ڈرون طیارے خرید کرنے کا معاہدہ کرنے کی تیاری کر رہا ہے۔
فلسطین نیوز کو موصول ہونے والی اطلاعات کے مطابق دونوں ملکوں میں کروڑوں یورو مالیت کی یہ ڈیل گذشتہ برس ہونا تھی مگر برلن کی سیاسی قیادت کو اس پر تحفظات تھے۔اخبار ’دا مارکر‘اور ’ہارٹز‘ نے اپنی رپورٹ میں کہا ہے کہ اسرائیل کی فضائی صنعت کی سب سے بڑی کمپنی اور جرمن فضائی فورسز کے درمیان آئندہ چند ہفتوں کے دوران ایک بڑی ڈیل متوقع ہے۔ اس ڈیل کے تحت اسرائیل اپنے ہاں تیار ہونے والے ڈرون طیارے جرمن فوج کو فروخت کرے گا۔
امریکی ویب سائیٹ ’ڈیفنس نیوز‘ کے مطابق جرمن وزارت دفاع جلد ہی بغیر پائلٹ ڈرون طیاروں کی خریداری کے لیے حرکت میں آئے گی۔
رپورٹ کے مطابق دونوں ملکوں کے درمیان ڈرون طیاروں کی ڈیل گذشتہ برس موسم گرما میں اس وقت تعطل کا شکار ہو گئی تھی جب سیاسی جماعت سوشل ڈیموکریٹک پارٹی نے اس ڈیل کی ترویج روک دی تھی۔ سوشل پارٹی کا کہنا تھا کہ جرمنی کو اخلاقی طور پر قتل اور ٹارگٹ کلنگ کے لیے اسرائیل سے ڈرون طیارے نہیں خرید کرنے چاہئیں۔