تہران (فلسطین نیوز۔مرکز اطلاعات) رہبر انقلاب اسلامی سید علی خامنہ ای نے فرمایا ہے کہ اسرائیل کے ساتھ مذاکرات ایک ناقابل معافی جرم ہے۔
فلسطین نیوز کو موصول ہونے والی اطلاعات کے مطابق حماس کے سربراہ ڈاکٹر اسماعیل ہنیہ کے خط کے جواب میں رہبر انقلاب اسلامی سید علی خامنہ ای نے فرمایا ہے کہ دھوکے باز، دروغگو اور غاصب حکومت کے ساتھ مذاکرات ایک ناقابل معافی جرم ہے کیونکہ اس کے نتیجے میں فلسطینی عوام کو ناقابل تلافی نقصان پہنچے گا۔رہبرانقلاب اسلامی نے اپنے جوابی خط میں فلسطینی کاز اور فلسطینی مجاہدین کی مکمل حمایت کا اعادہ کرتے ہوئے فرمایا کہ مسئلہ فلسطین کا حل یہ ہے کہ عالم اسلام میں مزاحمتی محاذ کی تقویت اور غاصب صیہونی حکومت کے خلاف جدوجہد کو تیز کیا جائے۔
رہبرانقلاب اسلامی نے اپنے خط میں فرمایا کہ اسلامی جمہوریہ ایران خود کو فلسطینیوں کی ہر طرح کی حمایت کا پابند سمجھتا ہے اور یہ ہمارا دینی اور انسانی فریضہ ہے اور ہم سیاسی تبدیلیوں کو خاطر میں لائے بغیر اس فریضے پر عمل کرتے رہیں گے۔
قابل ذکر ہے کہ حماس کے سربراہ ڈاکٹر اسماعیل ہنیہ نے کچھ عرصے قبل رہبر انقلاب اسلامی سید علی خامنہ ای کے نام اپنے خط میں بیت المقدس اور فلسطینی عوام کے خلاف عالمی سامراجی طاقتوں کی ریشہ دوانیوں کی جانب اشارہ کرتے ہوئے فلسطینی کاز کی حمایت پر آپ کا شکریہ ادا کیا تھا۔
ڈاکٹر اسماعیل ہنیہ نے اپنے خط میں لکھا تھا کہ ہم غرب اردن اور بیت المقدس میں عوام کی پرجوش تحریک انتفاضہ شروع کر کے خداوند متعال کے حکم سے مسئلہ فلسطین کے خلاف طاغوت عصر امریکہ اور منافق حکمرانوں کی سازشوں کو ناکام بنا دیں گے۔