سرکاری صیہونی ویب سائیٹس پر بھرپور سائبر حملہ

مقبوضہ بیت المقدس (فلسطین نیوز۔مرکز اطلاعات) اسرائیلی حکام کا کہنا ہے کہ گذشتہ شب سرکاری ویب سائیٹس کو نامعلوم ہیکروں کی جانب سے تباہ کن سائبر حملے کا نشانہ بنایا ہے، ہیکروں نے کئی ویب سائیٹس تک رسائی حاصل کرنے کے بعد ان پر ’القدس فلسطین کا داراحکومت‘ جیسے نعرے پوسٹ کردیے۔ اس کے علاوہ کئی ویب سائیٹس پر اذان پوسٹ کردی گئی اور سائیٹس کھولنے کے ساتھ ہی ’اللہ اکبر‘ کی آواز سن کر حیران ہوگئے۔

فلسطین نیوز کو موصول ہونے والی اطلاعات کے مطابق اسرائیلی حکام کا کہنا ہے کہ نامعلوم ہیکروں نے کئی ویب سائیٹس کو ہیکنگ کانشانہ بنایا۔ انہوں نے فلسطینیوں کے پُرامن مظاہروں کی تصاویر بالخصوص غزہ کی پٹی میں 42 ویں یوم الارض کے موقع پر اسرائیلی حملے میں شہید اور زخمی ہونے والے فلسطینیوں کی تصاویر پوسٹ کردیں۔

اسرائیل کی بعض سرکاری ویب سائیٹس پر انگریزی زبان میں نعرے پوسٹ کیے گئے جن میں ’القدس فلسطین کا دارالخلافہ‘ اور ہم اپنے شہداء کو فراموش نہیں کریں گے‘ جیسے الفاظ درج کیے گئے۔

رپورٹ کے مطابق گذشتہ شب ہیکروں نے ایلات، عکا، عکاف سابا، گیوات شموئیل، اور یہودا، نتانیا، ھرٹزیلیا کونسلوں، اسرائیلی اساتذہ یونین، ہلیل یافی اسپتال اور اوپرا جیسے اداروں کی سائیٹ ہیک کیں۔

ہیک کی گئی ویب سائیٹس کھولنے پر پہلے اذان سنائی دینے لگی۔ اس کے علاوہ اسرائیلی ناظرین اور قارئین ویب سائیٹس پر فلسطینی مظاہرین، شہداء اور زخمیوں کی تصاویر دیکھ کر چونک گئے۔