غزہ (فلسطین نیوز۔مرکز اطلاعات) اسلامی تحریک مزاحمت ’حماس‘ کے سیاسی شعبے کے سربراہ اسماعیل ھنیہ نے فلسطین میں ’یوم الارض‘ کے موقع پر اسرائیلی فوج کی ریاستی دہشت گردی کے حوالے سے عالمی رہنماؤں سے رابطے شروع کیے ہیں۔
فلسطین نیوز کو موصول ہونے والی اطلاعات کے مطابق سوموار کو حماس کے رہنما اسماعیل ھنیہ نے عرب لیگ کے سیکرٹری جنرل احمد ابو الغیط سے ٹیلیفون پر بات چیت کی۔اسماعیل ھنیہ کے دفتر سے جاری کردہ بیان میں کہا گیاہے کہ حماس کے سیاسی شعبے کے سربراہ نے عرب لیگ کے سیکرٹری جنرل سے فلسطین کے علاقے غزہ کی پٹی میں اسرائیلی فوج کی حالیہ ریاستی دہشت گردی پر بات چیت کی۔
اسماعیل ھنیہ نے غزہ میں ’یوم الارض‘ ریلیوں پر صیہونی فوج کی وحشیانہ کارروائیوں، غزہ کی ناکہ بندی اور دیگر صیہونی جرائم کے حوالے سے عرب لیگ کے سیکرٹری جنرل کو آگاہ کیا۔
حماس رہنما نے فلسطینیوں کے خلاف صیہونی فوج کے وحشیانہ کریک ڈاؤن اور قتل عام کی روک تھام کے لیے عالمی عدالت انصاف سے رجوع کرنے پر زور دیا۔ انہوں نے امریکا کی جانب سے فلسطینیوں کے خلاف اسرائیلی جرائم کی قرارداد ویٹو کیے جانے کی بھی شدید مذمت کی اور کہا کہ صیہونی ریاستÂ اور امریکا مل کر فلسطینیوں کے بنیادی حقوق کا استحصال کر رہے ہیں۔
دوسری جانب عرب لیگ کے سیکرٹری جنرل احمد ابو الغیط نے بھی صیہونی فوج کی جانب سے غزہ میں پُرامن ریلیوں پر فائرنگ اور وحشیانہ تشدد کی شدید مذمت کی۔ ان کا کہنا تھا کہ غزہ میں پُرامن مظاہرین کے خلاف طاقت کا بے تحاشا استعمال قابل مذمت اقدام ہے اور اس حوالے سے آج منگل کو عرب لیگ کا ہنگامی اجلاس بھی طلب کیا گیا ہے۔
احمد ابو الغیط نے اسرائیلی دہشت گردی میں شہید ہونے والے فلسطینیوں کے اہل خانہ سے تعزیت کی اور زخمیوں کی جلد صحت یابی کی خواہش کا اظہار کیا۔