قاہرہ ( فلسطین نیوز۔مرکز اطلاعات) ’یوم الارض‘ پر فلسطینیوں کی احتجاجی ریلیوں کو کلچنے کے لیے اسرائیلی فوج کی طرف سے طاقت کے وحشیانہ استعمال کی عالمی سطح پر مذمت جاری ہے۔
فلسطین نیوز کو موصول ہونے والی اطلاعات کے مطابق مصر کی سب سے بڑی دینی درس گاہ جامعہ الازھر نے پُرامن فلسطینی مظاہرین کے خلاف طاقت کے استعمال کی شدید الفاظ میں مذمت کی ہے۔جمعہ کی شام جامعہ الازھر کی طرف سے جاری کردہ ایک بیان میں کہا گیا ہے کہ بیالیسویں یوم الارض پر اسرائیلی فوج کا فلسطینیوں کی پرامن ریلیوں کے خلاف طاقت کا اندھا دھند استعمال ناقابل قبول ہے۔
جامعہ الازھر نے اپنے بیان میں فلسطینی قوم کے دیرینہ مطالبات اور آئینی حقوق کی پرزور حمایت کا اعادہ کیا ہے اور کہا ہے کہ فلسطینیوں کو اپنی سرزمین میں واپس جانے ،اس میں آباد ہونےاور اپنے حق خود ارایت کےحصول کا حق حاصل ہے۔
الازھر نے عالمی برادری، بین الاقوامی اداروں اور انسانی حقوق کی عالمی تنظیموں پر زور دیا کہ وہ فلسطینیوں کو ہرممکن تحفظ فراہم کریں اور فلسطینی قوم کو صیہونی ریاست کے جبرو تشدد سے نجات دلانے کے لیے اپنا کردار ادا کریں۔
خیال رہے کہ کل 30 مارچ جمعہ کے روز فلسطین بھرمیں ’یوم الارض‘ کی مناسبت لاکھوں فلسطینیوں نے سڑکوں پر نکل کر احتجاجی ریلیاں نکالیں۔ اس موقع پر اسرائیلی فوج نے فلسطینیوں کے خلاف طاقت کا وحشیانہ استعمال کیا جس کے نتیجے میں ایک درجن سے زائد فلسطینی شہید اور سیکڑوں زخمی ہوگئے۔