مقبوضہ بیت المقدس ( فلسطین نیوز۔مرکز اطلاعات) خلیجی ملکوں اور اسرائیل کے درمیان پس چلمن بڑھتے تعلقات کی خبریں ذرائع ابلاغ میں آتی رہتی ہیں۔ اسی ضمن میں ایک تازہ خبر یہ ہے کہ اسرائیل اور متحدہ امارات قبرص میں جاری علاقائی فوجی مشقوں میں شریک ہیں۔ تاہم اسرائیلی ریاست نے ان مشقوں میں شمولیت کا اعلان اس لیے نہیں کیا کہ اس میں امارات بھی شریک ہے۔
فلسطین نیوز کو موصول ہونے والی اطلاعات کے مطابق اس خفیہ صیہونی۔ اماراتی گٹھ جوڑ کا بھانڈہ اسرائیل کے عبرانی ٹی وی’ 12 نیوز‘ نے پھوڑا اور بتایا ہے کہ یہ مشقیں تین روز سے قبرص میں "Iniochos 2018” کے عنوان سے جاری ہیں جو کل جمعرات تک جاری رہیں گی۔عبرانی ٹی کا کہنا ہے کہ اسرائیل عموما اپنی فوجی مشقوں کو مشتہر کرنے کے لیے بھرپور میڈیا مہم چلاتا رہا ہے مگر یہ پہلا موقع ہے جب اسرائیلی ریاست نے ان فوجی مشقوں میں اپنی شمولیت ظاہر نہیں کی۔ مشقوں کے آغاز میں شریک ممالک کی پرچم کشائی کی گئی مگر اسرائیلی پرچم نہیں لہرایا گیا اور فوجی افسران میں سے کسی اسرائیلی فوجی کی تصویر نہیں بنائی گئی۔
رپورٹ کے مطابق ان فوجی مشقوں میں متحدہ عرب امارات، قبرص، اسرائیل، یونا، فرانس اور اٹلی کی افواج حصہ لے رہی ہیں۔
مشقوں میں حصہ لینے والے اسرائیلی فوج کے فضائیہ کے دستوں کو ’ایف 16‘ جنگی طیارے فراہم کئے گئے ہیں۔ اس کے علاوہ جنگی طیارہ 117 بھی مشقوں میں شامل ہے۔ ان مشقوں کا مقصد علاقائی اور عالمی سطح پر سیکیورٹی تعاون کو فروغ دینا ہے۔
عبرانی ٹی نے اسرائیل کی جانب سے مشقوں میں اپنی شمولیت کو صیغہ راز میں رکھنے کی وجہ امارات کی شرکت بتائی ہے۔ رپورٹ میں کہا گیا ہے کہ ماضی میں اسرائیل عرب ممالک کے ساتھ ہونے والی مشقوں میں اعلانیہ شرکت کرچکا ہے مگر متحدہ عرب امارات کے ساتھ ہونے والی مشقوں میں اسرائیلی شرکت کو مخفی رکھا گیا۔