مقبوضہ بیت المقدس ( فلسطین نیوز۔مرکز اطلاعات) اسرائیلی وزیر دفاع آوی گیڈور لائبرمین نے بتایا ہے کہ اسرائیلی ریاست کے میزائل دفاعی نظام کے لیے امریکی کانگریس نے ریکارڈ امداد جاری کرنے کا اعلان کیا ہے۔ امریکی کانگریس نے اسرائیلی ریاست کے میزائل ڈیفینس سسٹم کے لیے 70 کروڑ 50 لاکھ ڈالر کی امداد کا بجٹ منظورکیا ہے۔
فلسطین نیوز کو موصول ہونے والی اطلاعات کے مطابق سنہ 1948ء میں فلسطین میں اسرائیلی ریاست کے قیام کے بعد امریکی کانگریس کی جانب سے یہ پہلی غیرمعمولی رقم ہے جو اس مد میں ادا کی جانی ہے۔مائیکرو بلاگنگ ویب سائیٹ ’ٹوئٹر‘ پرپوسٹ کردہ ایک بیان میں لائبرمین نے کہا کہ مجھے امریکی کانگریس کا وہ اعلان سن کر مسرت ہوئی کہ امریکا اسرائیلی دفاعی نظام کے فروغ کے لیے سال 2018ء کے دوران 705 ملین ڈالر کی رقم ادا کرے گا۔
ان کا کہنا تھا کہ موجودہ امریکی حکومت اسرائیل کے ساتھ بڑھ چڑھ کر تعاون کررہی ہے۔ ہمیں توقع تھی کہ امریکی انتظامیہ اور کانگریس اسرائیل کے دفاعی نظام کے لیے اتنی خطیر رقم منظور کرے گی۔ ہم اپنے دشمنوں کو اپنے ناقابل تسخیر دفاعی نظام کے ذریعے ’سرپرائز‘ دیں گے۔
آوی گیڈور لایبرمین نےامریکی کانگریس اور حکومت کا اس غیرمعمولی فنڈ پر شکریہ ادا کیا اور کہا کہ اسرائیلی ریاست اپنے دفاع کے لیے سالانہ 6 ارب 50 کروڑ ڈالر کی رقم صرف کررہی ہے۔