پیرس (فلسطین نیوز۔مرکز اطلاعات) بیرون ملک موجود فلسطینی فن کار اور آرٹسٹ ایک عرصے سے ’فلسطین میوزیم‘ کے قیام کے لیے کوشاں تھے۔ حال ہی میں فلسطینی فن کار اپنے اس دیرینہ خواب کو شرمندہ تعبیر کرنے میں کامیاب ہوگئے۔
فلسطین نیوز کو موصول ہونے والی اطلاعات کے مطابق ’فلسطین میوزیم‘ کا قیام فرانس کے صدر مقام پیرس میں گذشتہ جمعہ کو عمل میں لایا گیا۔یہ اقدام فلسطین میں معاصرفنون آرگنائزیشن کی جانب سے کیا گیا۔ پیرس میں قائم کردہ میوزیم کے موقع پر ایک نمائش کا بھی اہتمام کیا گیا۔ جسے ’ہم فن سے محبت کرتے ہیں کا عنوان دیا گیا۔نمائش میں فلسطینی شاعر محمود درویش کے بعض قصائد کو آرٹ اور فن پاروں کی شکل میں پیش کیا گیا۔
میوزیم کی افتتاح تقریب میںÂ عرب ممالک کے سفارت کاروں اور فرانسیسی سماجی، سیاسی اور شوبز کی شخصیات نے شرکت کی۔ اس موقع پر ’یونیسکو‘ میں فلسطینی سفیر الیاس صنبر نے کہا کہ نمائش فلسطینیوں کی طرف سے نہیں بلکہ فلسطین کے لیے لگائی گئی ہے۔
انہوں نے فلسطین نیشنل میوزیم کی شاخ قائم کرنے میں تعاون کرنے اور یکجہتی کرنے والے فن کاروں اور دیگر شخصیات کا شکریہ ادا کیا۔ ان کا کہنا تھا کہ خوش آئند بات یہ ہے کہ میوزم کی نمائش میں یہودی فن کاروں سمیت مختلف مذاہب سے تعلق رکھنے والی شخصیات نے شرکت کرکے ہماری حوصلہ افزائی کی ہے۔
عالم عرب انسٹیٹیوٹ کے ڈائریکٹر ایرک ڈیلبون کا کہنا تھا کہ میوزیم میں مختلف تجریدی آرٹسٹوں کی طرف سے پیش کردہ فن پارے فلسطینی قوم کے لیے تحفہ ہیں۔ اس موقع پر یورپی ملکوں اور دنیا کے دوسرے خطوں سے تعلق رکھنے والے 130 فن کاروں اور آرٹسٹوں کے نمونے پیش کیے گئے۔