رام اللہ (فلسطین نیوز۔مرکز اطلاعات) فلسطینی اتھارٹی کے ماتحت سیکیورٹی اداروں نے تازہ چھاپہ مار کارروائیوں میں کئی سابق اسیران سمیت کم سے کم 13 فلسطینیوں کو حراست میں لے لیا ہے۔
فلسطین نیوز کو موصول ہونے والی اطلاعات کے مطابق غرب اردن کے مختلف علاقوں میں عباس ملیشیا کی تازہ کارروائیوں کے دوران نہتے شہریوں کو تشدد کا بھی نشانہ بنایا گیا۔ متعدد شہریوں کو سیکیورٹی مراکز میں پیشی کے نوٹس جاری کیے گئے ہیں۔ عباس ملیشیا نے تلاشی کے دوران ایک سابق اسیر کو وحشیانہ تشدد کا نشانہ بنایا جب کہ دسیوں فلسطینی پہلے سے مسلسل غیر قانونی طور پر حراست میں ہیں۔جنین شہر میں عباس ملیشیا نے تلاشی کی کارروائیوں کے دوران دو فلسطینی نوجوانوں یونس اور محمد خنفر کو حراست میں لے لیا۔ انہیں بچانے کے لیے ایک مقامی بزرگ رہنما الشیخ ماھر الاخرس نے مداخلت کی تو عباس ملیشیا نے ان کے بیٹے اسلام کو بھی گرفتار کرلیا۔
شمالی شہر طوباس میں ایک کارروائی کے دوران عباس ملیشیا نے منیر فقہا، عربی ابو دواس، فادی عبدالرزاق، احمد عبدالطیف، عروہ ابراہیم دراغمہ، احمد جہاد صوافطہ اور دیگر کو حراست میں لے لیا۔