رام اللہ (فلسطین نیوز۔مرکز اطلاعات) فلسطینی محکمہ اسیران کی طرف سے جاری کردہ ایک رپورٹ میں بتایا گیا ہے کہ سنہ 1967ء کی جنگ کے بعد اسرائیلی فوج نے تقریبا 15 ہزار فلسطینی خواتین کو حراست میں لیا۔
فلسطین نیوز کو موصول ہونے والی اطلاعات کے مطابق فلسطینی محکمہ امور اسیران کی طرف سے جاری کردہ ایک بیان میں کہا گیا ہے کہ صیہونی فوج کے ہاتھوں حراست میں لی گئی خواتین میں 62 اب بھی صیہونی زندانوں میں قید ہیں۔ ان میں 8 کو زخمی حالت میں حراست میں لیا گیا، 10 اسیرات کی عمریں اٹھارہ سال سے کم ہیں، 20 شادی شدہ اور تین انتظامی حراست کے تحت پابند سلاسل ہیں۔محکمہ امور اسیران کا کہنا ہے کہ فلسطینی خواتین کا فلسطینی تحریک آزادی میں کلیدی کردار ہے۔ ان میں کئی اسیرات شہید، زخمی، جیلوں میں قید رہنے کے ساتھ جلا وطن بھی کی گئیں۔