لندن (فلسطین نیوز۔مرکز اطلاعات) عوامی کمیٹی برائے امداد غزہ کے سربراہ عصام یوسف نے انروا کی فنڈنگ میں کمی کے باعث فلسطینی مہاجرین کو پیش آنے والی مشکلات سے خبردار کیا ہے۔
صحافیوں کو جاری کردہ ایک بیان میں یوسف کا کہنا تھا کہ انروا کی فنڈنگ میں کمی کی وجہ سے لبنان، اردن، شام، غزہ اور مغربی کنارے میں رہنے والے مہاجرین کی زندگیوں پر اثرات واضح ہیں۔ ان کا کہنا تھا کہ خاص طور پر صحت اور تعلیم کے شعبوں پر پڑنے والے اثرات کو دیکھا جاسکتا ہے۔انہوں نے مزید بتایا کہ لبنان میں موجود فلسطینی مہاجرین کو انروا کے حالات دیکھتے ہوئے اپنے مستقبل سے متعلق خدشات ہورہے ہیں۔
انہوں نے بتایا کہ صحت کے شعبے میں بھی حالات کسی طور بہتر نہیں ہیں۔ یوسف نے بین الاقوامی برادری پر زور ڈالا کہ وہ مہاجرین کو دی جانے والی سہولیات میں کمی کے حوالے ذمہ داریوں کا احساس کریں۔
انہوں نے ڈونر ممالک سے مطالبہ کیا کہ وہ انروا سے ختم کی جانے والی امریکی امداد کے نقصان کا ازالہ کریں تاکہ امریکی صدر ڈونلڈ ٹرمپ کے فیصلے کے منفی اثرات پر قابو پایا جاسکے۔