قاہرہ – (فلسطین نیوز۔مرکز اطلاعات) مصرکی سب سے بڑی دینی درس گاہ جامعہ الازھر ایک بار پھر القدس کے حوالے سے اپنا دیرینہ موقف دہرایا ہے۔ جامعہ الازھر کا کہنا ہے کہ اسرائیل ایک غاصب اور قابض ریاست ہے۔ بیت المقدس کو اسرائیل کا دارالحکومت کیسے بنایا جاسکتا ہے اورامریکی سفارت خانے کو بیت المقدس منتقل کرنے کا کیا جواز ہے۔
فلسطین نیوز کو موصول ہونے والی اطلاعات کے مطابق قاہرہ میں القدس کے دفاع کے حوالے سے نکالی گئی ایک ریلی سے خطاب میں جامعہ الازھر کے مشیر ڈاکٹر محمد مھنا نے کہا کہ بیت المقدس پر اسرائیل کا ناجائز قبضہ قائم ہے۔ جب تک اسرائیل کا ناجائز قبضہ ختم نہیں ہوتا اس وقت تک امریکا کو ایسا کوئی احمقانہ قدم نہیں اٹھانا چاہیے۔ڈاکٹر مہنا کا کہنا تھا کہ صیہونی ریاست غاصب، قابض، خلاف قانون اور خلاف منطق ہے۔ قانونی طور پر اسرائیل کوئی ملک ہی نہیں اور اس میں امریکی سفارت خانے کے قیام کا سوال ہی پیدا نہیں ہوتا۔
انہوں نے کہا کہ مصر مسلمان اورعرب ممالک میں سب پہلا ملک ہے جس نے القدس میں امریکی سفارت خانے کے قیام اور القدس کو صیہونی ریاست کا دارالحکومت قرار دینے کی مخالفت کی ہے۔