مقبوضہ بیت المقدس – (فلسطین نیوز۔مرکز اطلاعات) اسرائیلی انتظامیہ نے مقبوضہ مشرقی بیت المقدس میں مقامی فلسطینی شہریوں کے پانچ مکانات کو غیرقانونی قرار دے کر مسمار کرنے کے نوٹس جاری کیے ہیں۔
فلسطین نیوز کو موصول ہونے والی اطلاعات کے مطابق ’جبل البابا‘ مقامی عرب کالونی کے مندوب عطا اللہ مزارعہ نے بتایا کہ صہیونی سول ایڈمنسٹریشن کے اہلکاروں نے فوج کے ہمراہ کالونی پر چھاپہ مارا اور پانچ مکانوں کو غیرقانونی قرار دے کر انہیں فوری طور پر مسمار کرنے کے احکامات جاری کیے ہیں۔قدس پریس کے مطابق صہیونی حکام نے عودہ مزارعہ، ھانی عویضات، خلیل جھالین، غسان جھالین اور فائز الھرش کو اپنےمکانات خالی کرنے کے احکامات دیے ہیں۔
ان کا کہنا ہے کہ مکانات کی مسماری کی صورت میں بچوں اور خواتین سمیت 30 فلسطینی بے گھر ہوسکتے ہیں۔
خیال رہے کہ بیت المقدس میں فلسطینیوں کے مکانات کی مسماری صہیونی ریاست کے’عظیم تر القدس پروگرام‘ کا حصہ ہے جسے صہیونی ریاست ’E1‘ کے نام سے مشہورکررہی ہے۔ اس سازش کے تحت غرب اردن اور بیت المقدس کے 12 ہزار دونم علاقے پر قبضہ کرکے اس پر صہیونی آباد کاری کے منصوبے شروع کرنا ہے۔