مقبوضہ بیت المقدس – (فلسطین نیوز۔مرکز اطلاعات) اسرائیلی میڈیا نے انکشاف کیا ہے کہ وزیراعظم بنجمن نیتن یاھو نے مقبوضہ بیت المقدس میں بیت صفافا کے مقام پر ’جبعات ھمطوس‘ صہیونی کالونی میں مزید 2600 نئے مکانات کی منظوری دیتے ہوئے پورے شہر میں صہیونی آباد کاری میں تیزی لانے کے احکامات جاری کیے ہیں۔
فلسطین نیوز کو موصول ہونے والی اطلاعات کے مطابق عبرانی جریدہ ’یروشلم‘ میں اسرائیل کی حکمراں جماعت کے رکن اور بیت المقدس میں صہیونی آباد کاری کے ایک بڑے ٹھیکیدار ’ایلن گورڈو‘ نے بتایا کہ وزیراعظم نے حکم دیا ہے کہ مشرقی بیت المقدس بالخصوص بیت صفافا میں اڑھائی ہزار سے زائد مکانات فوری طور مکمل کیے جائیں۔ارپورٹ کے مطابق ایلن گورڈو نے ’گیوات مشواہ‘ صہیونی کالونی میں بات چیت کرتے ہوئے کہا کہ حال ہی میں اسرائیلی وزیراعظم شاہراہ بیگن کے پہلے فیز کی تعمیر کی منظوری دے چکے ہیں۔ اس کے ساتھ ساتھ گیلو صہیونی کالونی کے رز مریزن روڈ کا بھی افتتاح کیا گیا ہے۔
گیوات ھمطوس میں یہودیوں کے لیے مکانات کی تعمیر کا منصوبہ کئی سال پرانا ہے۔ کالونی میں ترقیاتی اور تعمیراتی کاموں کے جاری رہنے کے باوجود یہ منصوبہ مکمل نہیں کیا جاسکا۔ نیتن یاھو نے اس منصوبے کی وجہ سے پیدا ہونے والے اختلافات کو ختم کرکے جلد از جلد اسے مکمل کرنے کی تاکید کی ہے۔
رپورٹ کے مطابق منصوبے کے تحت 2600 نئے مکانات کی تعمیر جلد مکمل کی جائے گی۔ ان میں سے 600 مکانات اسرائیل کے عرب شہریوں کے لیے تعمیر کرنے کا بھی دعویٰ کیا گیاہے۔