مقبوضہ بیت المقدس – (فلسطین نیوز۔مرکز اطلاعات) فلسطین مرکزی پریس کلب نے اسرائیلی فوج کی جانب سے صحافیوں کو فائرنگ کا نشانہ بنائے جانے کے واقعات کی شدید الفاظ میں مذمت کی ہے۔
فلسطین نیوز کو موصول ہونے والی اطلاعات کے مطابق فلسطین پریس کلب کی طرف سے جاری کردہ ایک بیان میں بتایا گیا ہے کہ 14 جولائی کے بعد مسجد اقصیٰ میں جاری پرتشدد جھڑپوں میں 30 فلسطینی صحافی بھی زخمی ہوئے ہیں۔بیان میں کہا گیا ہے کہ زخمی ہونے والے صحافیوں میں بعض غیرملکی خبر رساں اداروں کے ساتھ کام کرتے ہیں۔ ان میں سے بعض صحافی غرب اردن میں اسرائیلی دہشت گردی کی مخالفت اور مسجد اقصیٰ کی حمایت میں نکالی جانے والی ریلیوں کے دوران زخمی ہوئے۔
فلسطین پریس کلب نے رام اللہ میں پال میڈیا کے دفتر پر اسرائیلی فوج کے چھاپے کی شدید الفاظ میں مذمت کی ہے۔ بیان میں کہا گیا ہے کہ پال میڈٰیا المیادین، رشیا ٹوڈے، المنار، بی بی سی اور دیگر خبر رساں اداروں کو تکنیکی اورفنی معاونت فراہم کرتا ہے۔ اسرائیلی فوج کی طرف سے پال میڈیا کمپنی کے دفتر پر دھاوا فلسطینی ذرائع ابلاغ پر حملہ ہے۔