غزہ – (فلسطین نیوز۔مرکز اطلاعات) اسلامی تحریک مزاحمت ’حماس‘ نے فلسطینی اتھارٹی کی طرف سے شہداء اور اسیران کے اہل خانہ کو دی جانے والی مالی مراعات ختم کرنے کی شدید مذمت کرتے ہوئے اسے رام اللہ حکومت کی شہریوں کے خلاف معاشی دہشت گردی قرار دیا ہے۔
فلسطین نیوز کو موصول ہونے والی اطلاعات کے مطابق حماس کے ترجمان فوزی برھوم نے ایک بیان میں کہا ہے کہ فلسطینی اسیران اور شہداء کے اہل خانہ کو ماہانہ بنیاد پر ملنے والے وظائف بند کرنا غیراخلاق اور انتہائی شرمناک اقدام ہے جس کی جتنی مذمت کی جائے کم ہے۔حماس کے ترجمان کا کہنا ہے کہ اسیران اور شہداء کے لواحقین کو ملنے والی امداد بند کرنا صہیونی ریاست کے مطالبات تسلیم کرنے کے مترادف ہے۔ فلسطینی اتھارٹی کے اقدامات سے واضح ہو گیا ہے کہ وہ اسرائیل اور غیرملکی اشاروں پر قوم کو بنیادی مراعات سے محروم کرتے ہوئے اسرائیلی موقف کو درست قرار دینے کے لیے کوشاں ہے۔
فوزی برھوم کا کہنا ہے کہ فلسطینی اتھارٹی نے شہداء اور اسیران کے اہل خانہ کے مالی وظائف ختم کرکے بے سہارا شہریوں کے منہ سے نوالہ چھیننے کی مجرمانہ اور قابل مذمت کوشش کی ہے۔ فلسطینی اتھارٹی کے اس اقدام کی پوری قوم کی طرف سے مذمت جاری ہے۔ فلسطینی اتھارٹی کے اس اقدام پر حماس شہداءاور اسیران کے اہل خانہ کے ساتھ کھڑی ہے۔ انہوں نے کہا کہ جو کام صہیونی ریاست خود نہیں کرسکی وہ اس کی آلہ کار فلسطینی اتھارٹی کررہی ہے۔ شہداء اور اسیران کے اہل خانہ کی امداد روکنا اور شہداء کے یتیم بچوں کے منہ سے روٹی کا نوالہ چھیننا معاشی دہشت گردی ہے۔
خیال رہے کہ گذشتہ روز فلسطینی اتھارٹی اور وزیراعظم رامی الحمد اللہ نے شہداء اور اسیران کے اہل خانہ کو ملنے والی امداد مستقل طور پربند کرنے کا اعلان کیا تھا۔