مقبوضہ بیت المقدس – (فلسطین نیوز۔مرکز اطلاعات) اسرائیل کےسرکاری ذرائع ابلاغ کے مطابق وزیراعظم بنجمن نیتن یاھو اور وزیرصحت یعقوب لیٹزمن کے درمیان پس چلمن کئی روز سے اختلافات چلے آر ہے ہیں۔ دونوں کے درمیان اختلافات ’اسٹیٹ سروسز‘ کے مندوب کے لیے صوابدیدی عہدے پر تعیناتی کی وجہ سے پیدا ہوئے ہیں۔
فلسطین نیوز کو موصول ہونے والی اطلاعات کے مطابق عبرانی اخبار’معاریف‘ کے مطابق وزیراعظم نے موشے دایان کی جگہ اسٹیٹ سروسز کی ذمہ داری میخائل عبادی کو سونپی ہے جبکہ وزیرصحت اپنا من پسند بندہ تعینات کرنا چاہتے ہیں۔ذرائع کے مطابق وزیرصحت کی طرف سے وزیراعظم کو تنبیہ کی گئی ہے کہ اگر انہوں نے میخائل عبادی کی تعیناتی کا فیصلہ واپس نہ لیا تو وہ وزارت کا قلم دان چھوڑ دیں گے۔ تاہم لیٹزمن نے عبادی کی تعیناتی پر استعفیٰ دینے کی دھمکی کی تردید کی ہے۔ ذرائع کا کہنا ہے کہ پس چلمن دونوں رہنماؤں کے درمیان میخائل عبادی کی تعیناتی پر اختلافات بدستور موجود ہیں۔ ذرائع کا کہنا ہے کہ وزیراعظم نے وزیرصحت کی دھمکی کے بعد ان کے مطالبے پر غور کا عندیہ دیا ہے۔