نابلس – (فلسطین نیوز۔مرکز اطلاعات) فلسطینی بچوں نے انسانی زنجیر بنا کر اسرائیلی جیلوں میں بھوک ہڑتال کرنے والے فلسطینی قیدیوں کے ساتھ یکجہتی کا اعلان کیا ہے۔
فلسطین نیوز کو موصول ہونے والی اطلاعات کے مطابق پانچ سو سے زائد فلسطینی بچوں اور دیگر شہریوں نے فلسطینی قیدیوں کے قومی دن کے موقع پر مغربی کنارے کے شہر نابلس میں انسانی زنجیر بنائی اور بلدیہ کی عمارت کے سامنے سے شہدا اسکوائر کی جانب مارچ کیا۔انسانی زنجیر بنانے والے بچوں نے اپنے ہاتھوں میں فلسطین کے پرچم اور قیدیوں کی تصاویر اٹھا رکھی تھیں اور وہ اسرائیل کے نسل پرستانہ اور دہشت گردانہ اقدامات کی مذمت میں نعرے لگار ہے تھے۔رپورٹ کے مطابق فلسطینی قیدیوں کی حمایت میں مظاہروں کا سلسلہ تمام فلسطینی شہروں میں پھیل گیا ہے۔ قابل ذکر ہے کہ اسرائیلی جیلوں میں بند تقریبا ڈیڑھ ہزار فلسطینی قیدیوں نے صیہونی حکام کے نسل پرستانہ رویئے اور ایذا رسانی کے خلاف سترہ اپریل سے بھوک ہڑتال شروع کردی ہے۔
اس موقع پر خطاب کرتے ہوئے مقررین نے کہا کہ فلسطین کا بچہ بچہ اسیر بھائیوں اور بہنوں کے ساتھ ہے۔ نابلس کے پانچ سو بچوں نے اجتماعی انسانی زنجیر بنا کر یہ ثابت کیا ہے کہ قوم کا ہر فرد بھوک ہڑتال کرنے والے اپنے قیدی بھائیوں کے ساتھ کھڑا ہے۔