الخلیل – (فلسطین نیوز۔مرکز اطلاعات) اسرائیلی فوج نے دعویٰ کیا ہے کہ فورسز نے مقبوضہ مغربی کنارے کے جنوبی شہر الخلیل میں مسجد ابراہیمی کے قریب سے دو فلسطینیوں کو حراست میں لیا ہے جن پر صہیونی فوجیوں اور آباد کاروں پر چاقو سے فدائی حملوں کی منصوبہ بندی کا الزام عائد کیا گیا ہے۔
فلسطین نیوز کو موصول ہونے والی اطلاعات کے مطابقÂ ایک مقامی سماجی کارکن رائد ابو ارمیلہ نے بتایا کہ صہیونی فوج نے مسجد ابراہیمی کے قریب دو راہ گیر نوجوانوں کو روکا، ان کے سامان کی تلاشی لی جس کے بعد انہیں گرفتار کرکے نامعلوم مقام پر منتقل کردیا گیا ہے۔ عینی شاہدین کا کہنا ہے کہ اسرائیلی فوج نے دونوں فلسطینی نوجوانوں کے قبضے سے چاقو برآمد کرنے کا دعویٰ کیا ہے۔ گرفتار کیےگئے نوجوانوں کی شناخت نہیں ہوسکی ہے۔خیال رہے کہ اکتوبر 2015ء کے بعد شروع ہونے والی فلسطینی تحریک انتفاضہ القدس میں اب تک اسرائیلی فوج سیکڑوں فلسطینیوں کو فدائی حملہ آور ہونے کے شبے میں حراست میں لیے چکی ہے۔ چاقو رکھنے اور مبینہ فدائی حملوں کی منصوبہ بندی کی آڑ میں فلسطینی نوجوانوں کی اندھا دھند گرفتاریاں عمل میں لائی جاتی رہی ہیں۔