فلسطین نیوز کو موصول ہونے والی اطلاعات کے مطابق شمالی فلسطین کےشہر حیفا میں قائم ایک اسرائیلی عدالت نے سوموار کو 20 سالہ فلسطینی خالد مواسی کو ایک سال قید کی سزا کا حکم دیا۔ خالد مواسی کا تعلق مقبوضہ فلسطین کے عبلین قصبے سے ہے۔ اسرائیلی پراسیکیوٹر نے اس پر اسلامی تحریک مزاحمت ’حماس‘ کی سپورٹ کرنے اور سوشل میڈیا پر اسرائیل کے خلاف اشتعال پھیلانے کے الزامات کے تحت فرد جرم پیش کی تھی۔
’قدس پریس‘ کے مطابق خالد مواسی کو اس کے وکیل اور اسرائیلی پراسیکیوٹر جنرل کے درمیان طے پائے معاہدے کے بعد ایک سال قید کی سزا کا حکم دیا۔
اسرائیلی عدالت میں عائد کی گئی فرد جرم میں خالد مواسی پر الزام عائد کیا تھا کہ اس نے اپنے ’فیس بک‘ اور انسٹا گرام پر اسرائیل کے خلاف اشتعال انگیز مواد پوسٹ کیا تھا۔ اس کے ساتھ ساتھ اس نے حماس کی حمایت میں بھی بلاگ لکھے تھے۔
فلسطین میں انسانی حقوق کی تنظیموں کی طرف سے جاری کردہ رپورٹس میں بتایا گیا ہے کہ گذشتہ ایک سال کے دوران سوشل میڈیا پر اسرائیل کے خلاف سرگرمیوں کے الزام میں 150 فلسطینیوں کو حراست میں لے کران کے خلاف نام نہاد مقدمات قائم کیے گئے ہیں۔