مقبوضہ بیت المقدس – (فلسطین نیوز۔مرکز اطلاعات) فلسطین میں سرکاری سطح پر جاری کردہ اعداد و شمار میں بتایا گیا ہے کہ ملک میں ذیابیطس کے مریضوں کی تعداد 12 فی صد کی سطح عبور کرنے کے بعد یہ شرح 20 فی صد تک جا پہنچی ہے۔
فلسطین نیوز کو موصول ہونے والی اطلاعات کے مطابق ذیابیطس سینٹر کے ڈائریکٹر ڈاکٹر احمد ابو الحلاوہ کا کہنا ہے کہ فلسطین میں ذیابیطس کے مریضوں کی تعداد میں اضافے کی متعدد وجوہات ہیں۔ان میں موٹاپا، غیر فعال طرز زندگی کی طرف میلان، ورزش سے گریز اور خوراک کے معمولات میں بگاڑ ذیابیطس میں اضافے کی اہم ترین وجوہات ہیں۔ڈاکٹر ابو حلاوہ کا کہنا تھا کہ بعض دوسرے عوامل جو ذیابیطس کی بیماری کی طرف لے جانے کا سبب بنتے ہیں ان میں نفسیاتی دباؤ بھی شامل ہے اور نفسیاتی دباؤ فلسطین میں موجود اقتصادی اور سیاسی بحرانوں کا نتیجہ ہے جو بالواسطہ طور پر ذیابیطس کی بیماری کا موجب بنتے ہیں۔
انہوں نے بتایا کہ طبی ماہرین نے چند ماہ کے دوران متعدد مہمات کے دوران 900 افراد کا معائنہ کیا جن میں 30 افراد میں ذیابیطس کی بیماری کی علامات پائی گئیں۔ جب کہ دوسرے درجے کے ذیابیطس کے 1308 مریضوں کی تشخیص کی گئی۔