مقبوضہ بیت المقدس – (فلسطین نیوز۔مرکز اطلاعات) اسرائیلی فوج کی اعلیٰ قیادت نے فوج کے زیراستعمال تمام اقسام کے ٹینکوں کو اپ گریڈ کرنے اور ان پر جدید حفاظتی اور مواصلاتی آلات نصب کرنے کا اعلان کیا ہے۔
اسرائیلی فوج کی مقرب سمجھی جانے والی عبرانی نیوز ویب سائیٹ ’’این آر جی‘‘ نے عسکری ذرائع کے حوالے سے ایک رپورٹ میں بتایا ہے کہ فوج کی اعلیٰ قیادت کی طرف سے انجینرنگ کور کو ہدایت کی ہے کہ وہ ’’میرکافاہ‘‘ اور دیگر تمام اقسام کے ٹینکوں پر جدید مواصلاتی آلات نصب کریں تاکہ ٹینکوں کو کسی بھی وقت غزہ کی پٹی اور اسرائیل کی شمالی سرحد پر لبنان کے خلاف جنگ کی صورت میں دشمن کے حملوں میں زیادہ سے زیادہ نقصان سے بچا جاسکے۔رپورٹ میں بتایا گیا ہے کہ فوج کی طرف سے ٹینکوں کو جدید خطوط پر دفاعی آلات سے لیس کرنے کا فیصلہ پہلے ہی کیاگیا تھا۔ اس ضمن میں ایک درخواست وزارت دفاع کو ارسال کی گئی تھی۔ وزارت دفاع کے ڈائریکٹر جنرل Â جنرل اوڈی آدم نے جدید حفاظتی آلات خرید کرنے اور انہیں ’’میر کافاہ 4‘‘ او دیگر ٹینکوں پر نصب کرنے کی منظوری دی ہے۔ رپورٹ میں بتایا گیا ہے کہ ٹینکوں کو جدید حفاظتی آلات سے کیموفلاج کرنے کے منصوبے پر لاکھوں ڈالر کی رقم خرچ ہوگی۔
ٹینکوں کے علاوہ فوجی بسوں اور سامان کی منتقلی کے لیے استعمال ہونے والی بھاری گاڑیوں کو بھی جدید حفاظتی آلات سے لیس کرنے کی منظور دی گئی ہے۔