صہیونی فوج نے مسجد ابراہیمی کے قریب سے فلسطینی شہری گرفتار کرلیا

الخلیل – (فلسطین نیوز۔مرکز اطلاعات) صہیونی فوج نے فلسطین کے مقبوضہ مغربی کنارے کے جنوبی شہر الخلیل سے ایک فلسطینی شہری کو حراست میں لیا ہے، جس پر اسرائیلی فوجیوں پر چاقو سےحملے کی کوشش کا الزام عائد کیا گیا ہے۔ صہیونی فوج کا کہنا ہے کہ اس نے فلسطینی شہری کے قبضے سے چاقو بھی برآمد کیا ہے۔

فلسطین نیوز کو موصول ہونے والی اطلاعات کے مطابق صہیونی فوج کی طرف سے جاری کردہ ایک بیان میں کہا گیا ہے کہ مسجد ابراہیمی کے قریب ایک مشتبہ فلسطینی مزاحمت کار کو حراست میں لینے کے بعد تفتیش کے لیے نامعلوم مقام پر منتقل کیا گیا ہے۔

ادھرالخلیل شہر میں بیت امر کے مقام پر فلسطینی شہریوں اور اسرائیلی فورسز کے درمیان جھڑپوں کا سلسلہ بدستور جاری ہے۔ اطلاعات کے مطابق جمعہ کی شام بیت امر میں کشیدگی اس وقت پیدا ہوئی تھی جب اسرائیلی فوج نے گھر گھر تلاشی کا سلسلہ شروع کیا تو فلسطینی شہری اس کے خلاف بہ طور احتجاج سڑکوں پر نکل آئے تھے۔اس موقع پر فلسطینی شہریوں نے گذشتہ جمعرات کو شہید کیے گئے فلسطینی نوجوان خالد بحر کا جسد خاکی واپس کرنے کا بھی مطالبہ کیا۔ اسرائیلی فوج نے فلسطینی مظاہرین کو منتشر کرنے کے لیے ان پر آنسوگیس کی شیلنگ کی اور ربڑ کی گولیاں برسائیں جس کے نتیجے میں متعدد شہری زخمی ہوگئے۔