غزہ – (فلسطین نیوز۔مرکز اطلاعات) صہیونی فوج نے غزہ کی پٹی کے گرد زیرزمین اور سطح پر دیوار کی تعمیر پر جاری کام عارضی طور پر روک دیا ہے۔
فلسطین نیوز کو موصول ہونے والی اطلاعات کے مطابق غزہ کی پٹی کی سرحد پر کنکریٹ کی دیوار کی تعمیر کا پروجیکٹ فنڈز کی قلت کے باعث روک دیا ہے۔رپورٹ میں بتایا گیا ہے کہ صہیونی فوجی ماہرین نے منصوبے پرلاگت کا جو تخمینہ لگایا تھا وہ اس سے کہیں زیادہ ہے جو وہاں پر خرچ ہو رہی ہے۔ اسرائیلی فوجی ذریعے کا کہنا ہے کہ فنڈز کی قلت کے بعد فوج نے غزہ کی پٹی کے گرد دیوار کا ٹھیکہ دوبارہ کسی دوسری فرم کو دینے کا فیصلہ کیا ہے جو کم سے کم اخراجات پر ٹینڈر جاری کرے گی۔
خیال رہے کہ اسرائیل نے چند ماہ قبل غزہ کی پٹی کے گردو پیش میں کئی میٹر گہرائی میں اور سطح زمین پر کئی سو کلو میٹر طویل کنکریٹ کی دیوار کا منصوبہ شروع کیا تھا۔ صہیونی فوج کا کہنا ہے کہ اس منصوبے کا مقصد غزہ کی پٹی سے سنہ 1948ء کے مقبوضہ فلسطینی شہروں کے درمیان فلسطینی مزاحمت کاروں کی آمد ورفت روکنا اور سرنگوں کو ختم کرانا ہے۔