قاہرہ – (فلسطین نیوز۔مرکز اطلاعات) فلسطین میں یہودی توسیع پسندی کےبڑھتے واقعات کے تناظر میں عرب لیگ کی چار رکنی کمیٹی کا ہنگامی اجلاس قاہرہ میں منعقد ہوا جس میں عرب لیگ کے سیکرٹری جنرل احمد ابو الغیط سمیت عرب ممالک کے مندوبین نے شرکت کی۔
فلسطین نیوز کو موصول ہونے والی اطلاعات کے مطابق فلسطین میں یہودی آباد کاری پر نظر رکھنے کے لیے قائم کردہ فلسطین، مصر، اردن اور مراکش پر مشتمل چار رکنی کمیٹی کا ہنگامی اجلاس سوموار کو قاہرہ میں منعقد ہوا جس میں یہودی آباد کاری روکے جانے کے لیے عالمی سطح پر ہونے والی کوششوں کا جائزہ لیا گیا۔ اجلاس میں یہودی آباد کاری روکنے اور فلسطینی ریاست کے قیام کے لیے کوششیں تیز کرنے کا بھی فیصلہ کیا گیا ہے۔مصر میں متعین فلسطینی اتھارٹی کےسفیر جمال الشوبکی نے بتایا کہ چار رکنی عرب کمیٹی کا اجلاس فلسطین کی درخواست پر بلایا گیا۔ اجلاس میں سلامتی کونسل سے فلسطین میں یہودی آباد کاری رکوانے کے لیے قرار منظور کرانے اور فلسطین پر اسرائیلی قبضے کے لیے ٹائم فریم دینے کا مطالبہ کیا گیا۔ فلسطینی سفیر نے یہودی آباد کاری اور توسیع پسندی کی صہیونی سرگرمیوں کی شدید مذمت کی اور انہیں تنازع فلسطین کے دریاستی حل اور خطے میں قیام امن کی راہ میں ایک بڑی رکاوٹ قرار دیا۔ اجلاس میں مصری وزیرخارجہ سامح شکری، فلسطینی وزیرخارجہ ریاض المالکی، اردن کے وزیرخارجہ بشر الخصاونہ، مراکش کے مندوب اور عرب لیگ کے سیکرٹری جنرل احمد ابو الغیط نے شرکت کی۔