غزہ – (فلسطین نیوز۔مرکز اطلاعات) فلسطین کے علاقے غزہ کی پٹی میں اسرائیلی فوج کی جانب سے پھینکا گیا ایک بم ناکارہ بنانے کی کوشش کے دوران دھماکے سے ایک فلسطینی مزاحمت کار شہید اور کم سے کم تین زخمی ہوگئے۔
فلسطین نیوز کو موصول ہونے والی اطلاعات کے مطابق جمعرات کی شام غزہ کی پٹی میں اسلامی تحریک مزاحمت ’حماس‘ کے عسکری ونگ القسام شہید بریگیڈ کے کارکن اسرائیل کے پھینکے گئے ایک بم کو ناکارہ بنانے کی کوشش کررہے تھے بم اچانک دھماکے سے پھٹ گیا جس کے نتیجے میں موقع پر موجود ایک مزاحمت کار شہید اور تین زخمی ہوگئے۔القسام بریگیڈ کی طرف سے جاری کردہ ایک بیان میں تصدیق کی گئی ہے کہ ایک بم دھماکے سے شہید اور زخمی ہونے والے اس کے کارکن ہیں۔
ادھر فلسطینی وزارت صحت کے ترجمان ڈاکٹر اشرف القدرہ نے کہا ہے کہ جمعرات کی شام بم ناکارہ بناتے ہوئے ایک 30 سالہ شہری جام شہادت نوش کرگیا، شہید کی شناخت احمد اسعد میط کے نام سے کی گئی ہے جب کہ تین شہری زخمی ہوئے ہیں۔ جن میں سے ایک کی حالت تشویشناک بیان کی جاتی ہے۔ یہ واقعہ شمالی غزہ کی پٹی میں بیت حانون کے مقام پر پیش آیا۔