نابلس – (فلسطین نیوز۔مرکز اطلاعات) صہیونی فوج نے ایک فلسطینی شہری کو 12 سال قید میں رکھنے کے بعد رہا کر دیا۔ رہائی پانے والے 28 سالہ عزمی مروان برکات کا تعلق مقبوضہ مغربی کنارے کے شمالی شہر نابلس کے العین پناہ گزین کیمپ سے ہے۔
فلسطین نیوز کو موصول ہونے والی اطلاعات کے مطابق فلسطینی اسیر برکات کو غرب اردن کے شمالی شہر جنین کی الجلمہ گذرگاہ سے رہا کیا گیا۔ الجلمہ گذرگاہ پر مروان برکات کے اہل خانہ اور دیگر دوست احباب کی بڑی تعداد اس کے استقبال کے لیے جمع تھی۔ وہاں سے ایک قافلے کی شکل میں فلسطینی شہری کو العین پناہ گزین کیمپ میں اس کی رہائش گاہ تک لایا گیا۔عزمی مروان برکات کو اسرائیلی فوج نے 2004ء میں گرفتار کیا تھا۔ اس پراسلامی تحریک مزاحمت ’حماس‘ کے لیے کام کرنے کا الزام عاید کیا گیا۔ رہائی سے قبل برکات کو کئی جیلوں میں منتقل کیا جاتا رہا۔ آخر میں اسے مجد جیل سے رہا کیا گیا۔