(فلسطین نیوز۔مرکز اطلاعات) فلسطین میں اسرائیلی فوج کی ریاستی دہشت گردی کا سلسلہ جاری ہے۔ ہفتے کے روز صہیونی فوج نے مقبوضہ مغربی کنارے کے جنوبی شہر الخلیل میں تل ارمیدہ کے مقام پر ایک اور فلسطینی شہری کو گولیاں مار کر شہید کردیا۔
فلسطین نیوز کو موصول ہونے والی اطلاعات کے مطابق اسرائیلی فوج کی طرف سے جاری کردہ ایک بیان میں کہا گیا ہے کہ تل ارمیدہ کے مقام پر ایک فلسطینی شہری نے اسرائیلی پر چاقو سے حملہ کیا جس کے نتیجے میں فوجی اہلکار زخمی ہوگیا۔ موقع پر موجود دوسرے فوجیوں نے جوابی کارروائی کرتے ہوئے فلسطینی نوجوان پر فائرنگ کردی جس کے نتیجے میں وہ شدید زخمی ہوا۔ امدادی کارکنوں اور طبی حکام نے اسے طبی امداد فراہم کرنے کی کوشش کی مگر صہیونی فوجیوں نے امدادی کارکنوں کو اس کے قریب جانے سے روک دیا۔ادھر فلسطینی وزارت صحت کی طرف سے جاری کردی ایک بیان میں کہا گیاہے کہ ہفتے کے روز اسرائیلی فوج کی فائرنگ سے شہید ہونے والے فلسطینی نوجوان کی شناخت 25 سالہ حاتم عبدالحفیظ الشلودی کے نام سے کی گئی ہے۔ اس کا تعلق الخلیل شہر سے ہے جب کہ اسے تل ارمیدہ کے مقام پر اسرائیلی فوجیوں نے گولیاں مار کرشہید کردیا تھا۔
مقامی فلسطینی ذرائع کا کہنا ہے کہ فلسطینی نوجوان کو اس وقت گولیاں ماری گئیں جب وہ ایک فوجی چوکی کے قریب سے محاصرہ زدہ کالونی کی طرف جا رہا تھا۔
خیال رہے کہ گذش تین روز میں جاری اسرائیلی فوج کی ریاستی دہشت گردی کے نتیجے میں چار فلسطینیوں کو شہید کردیا گیا ہے۔