فلسطین نیوز کو موصول ہونے والی اطلاعات کے مطابق فلسطینی محکمہ امور اسیران کے چیئرمین عیسیٰ قراقع نے رام اللہ میں ایک نیوز کانفرنس سے خطاب کرتے ہوئے کہا کہ اسرائیل کی جیلوں میں متعدد فلسطینی اسیران بالخصوص مالک القاضی، محمد اور محمود البلبول نامی دو بھائیوں کی بھوک ہڑتال تیسرے مہینے میں جاری ہے۔ تینوں اسیران کو جیلوں سے اسپتالوں میں منتقل کیا گیا ہے جہاں انہیں زبردستی خوراک دینے کی مذموم کوشش کی جا رہی ہے۔
عیسی القراقع نے کہا کہ اسرائیلی انتظامیہ عدالت کی طرف سے اجازت ملنے کے بعد جاں بلب بھوک ہڑتالی اسیران کو جبرا خوراک دینے کی مذموم کوشش کررہی ہے۔ انہوں نے اقوام متحدہ سے مطالبہ کیا کہ وہ اسرائیلی جیلوں میں بلا جواز انتظامی حراست کے خلاف بہ طور احتجاج بھوک ہڑتال کرنے والے فلسطینی شہریوں کی زندگیاں بچانے کے لیے موثر کردار ادا کریں۔
خیال رہے کہ آج بدھ کو اقوام متحدہ کی انسانی حقوق کونسل کا 33 واں سالانہ اجلاس شروع ہو رہا ہے۔ اس اجلاس کے موقع پر بھی فلسطینی بھوک ہڑتالی اسیران کا معاملہ اٹھایا جائے گا۔ فلسطینی محکمہ امور اسیران نے انسانی حقوق کونسل کے رکن ملکوں کے نام اپنے پیغام میں کہا ہے کہ وہ بھوک ہڑتال کرنے والے فلسطینی قیدیوں کی زندگیاں بچانے کے لیے موثر کردار ادا کریں۔
خیال رہے کہ اسرائیل کی جیلوں میں زیرحراست متعدد فلسطینی شہریوں نے بلا جواز انتظامی قید کے خلاف طویل بھوک ہڑتال شروع کی ہے۔ ان میں تین اسیران محمد البلبول ، اس کےبھائی محمود البلبول اور مالک القاضی گذشتہ دو ماہ سے زاید عرصے سے بھوک ہڑتال جاری رکھے ہوئے ہیں۔ تینوں اسیران طویل بھوک ہڑتال کے نیتجے میں زندگی اور موت کی کشمکش میں مبتلا ہیں۔