(فلسطین نیوز۔مرکز اطلاعات) فلسطین کے مقبوضہ بیت المقدس شہر میں العیسویہ کے مقام پر گذشتہ روز ایک فلسطینی شہری کی کار کی ٹکر سے ایک اسرائیلی فوجی زخمی ہو گیا۔
فلسطین نیوز کو موصول ہونے والی اطلاعات کے مطابق گذشتہ روز العیسویہ میں مستودا چوک کے قریب بارڈر پولیس کے اہلکاروں نے سرخ رنگ کی ایک کار کو روکنے کا اشارہ کیا مگر کار کے ڈرائیور نے گاڑی کی رفتار بڑھا دی اور ایک فوجی اہلکار کو روندتے ہوئے چوک سے گذر گیا۔ پولیس نے گاڑی پر فائرنگ کی مگر فلسطینی شہری کار کو بھگا کر نامعلوم سمت میں لے گیا۔پولیس کے بیان میں بتایا گیا ہے کہ فلسطینی شہری کی گاڑی تلے روندے جانے والے اسرائیلی فوجی کو گہری چوٹیں آئی ہیں اور اسے علاج کے لیے اسپتال منتقل کر دیا گیا ہے۔ پولیس نے کار اور اس کے ڈرائیور کی تلاش شروع کر دی ہے تاہم آخری اطلاعات تک کار اور ڈرائیور کا کوئی پتا نہیں چل سکا ہے۔
خیال رہے کہ فلسطین میں گذشتہ برس اکتوبر کے بعد سے جاری تحریک انتفاضہ کے دوران فلسطینی شہریوں کی طرف سے یہودی فوجیوں پر کاریں چڑھائے جانے، چاقو سے حملے اور دیگر مزاحمتی اسالیب کے ذریعے کارروائیوں میں اضافہ ہوا ہے۔