(فلسطین نیوز۔مرکز اطلاعات) فلسطین کے مقبوضہ بیت المقدس میں ہفتے کے روز اسرائیلی پولیس نے ایک فلسطینی نوجوان کا تعاقب کرتے ہوئے اسے پولیس وین تلے روند ڈالا جس کے نتیجے میں فلسطینی شہری موقع پر شہید ہو گیا۔
اسرائیلی پولیس کی طرف سے جاری کردہ ایک بیان میں بتایا گیا ہے کہ سنہ 1948ء کے مقبوضہ فلسطینی علاقے سے ایک فلسطینی ٹرک چلاتے ہوئے بیت المقدس میں داخل ہوا تو پولیس نے اسے روکا اور شناخت کرانے کو کہا مگر اس نے ٹرک سے اتر کر سڑک پر دوڑ لگا دی۔ پولیس نے اسے پکڑنے کے لیے گاڑی اس کے پیچھے لگائی مگر وہ پولیس کی گاڑی کی ٹکر سے جاں بحق ہو گیا۔مقامی فلسطینی ذرائع نے شہید فلسطینی کی شناخت وسام غیث کے نام سے کی ہے جس کی عمر 26 سال اور تعلق بیت المقدس میں بیت حنینا سے بتایا جاتا ہے۔