(فلسطین نیوز۔مرکز اطلاعات) فلسطین کے مقبوضہ مغربی کنارے کے شمالی شہر نابلس میں حوارہ فوجی چیک پوسٹ سے اسرائیلی فوج نے ایک کارروائی کے دوران چار فلسطینی نوجوانوں کو حراست میں لینے کے بعد نامعلوم مقام پرمنتقل کردیا ہے۔
فلسطین نیوز کو موصول ہونے والی اطلاعات کے مطابق غرب اردن کے شمالی شہر نابلس میں اسرائیلی فوج نے حوارہ کے مقام سے چار فلسطینیوں کو گرفتار کرنے کے بعد دعویٰ کیا ہے کہ ان کے قبضے سے چاقو برآمد کیے گئے ہیں۔ گرفتار کیے گئے فلسطینی یہودی فوجیوں پر حملوں کی منصوبہ بندی کررہے تھے۔رپورٹ کے مطابق صہیونی فوجیوں نے حوارہ چوکی پر ایک فلسطینی کار کو روکا اور اس میں موجود فلسطینیوں کی تلاشی لی۔ اس کے بعد انہیں حراست میں لے لیا گیا۔ صہیونی فوج کا کہنا ہے کہ گرفتارکیے گئے فلسطینی یہودی فوجیوں پر حملوں کی منصوبہ بندی کے تحت جا رہے تھے۔
مقامی فلسطینی ذرائع نے حراست میں لیے گئے شہریوں کی شناخت نزال ھانی احمد بنی فضل، عاصف محمود عدیلی، یوسف ھانی بنی فضل اور محمد احمد حلبی کے ناموں سے کی گئی ہے جن کی عمریں 19 اور 27 سال کے درمیان بتائی جاتی اور ان کا تعلق نابلس کے عقربا اور اوصرین قصبوں سے بتایا جاتا ہے۔