فلسطینی نوجوانوں کا شہادت پسندانہ حملہ فلسطین پر غاصبانہ قبضے کا نتیجہ ہے

(فلسطین نیوز۔مرکز اطلاعات) تل ابیب کے میئر نے اس بات کا اعتراف کیا ہے کہ دو فلسطینی نوجوانوں کا شہادت پسندانہ حملہ فلسطینیوں کی سر زمینوں پر اسرائیل کے غاصبانہ قبضے کا نتیجہ ہے

تل ابیب کے میئر رون ہولدائی نے کہا کہ تل ابیب کے تجارتی مرکز پر دوفلسطینی نوجوانوں کےحالیہ حملے کا تعلق سرزمین فلسطین پر اسرائیل کے قبضے سے ہے۔

تل ابیب کے میئر نے اسرائیلی ریڈیو سے گفتگو کرتے ہوئے کہا کہ اسرائیل شاید وہ واحد جگہ ہے جہاں لوگ غاصبانہ قبضے کے تحت زندگی بسر کر رہے ہیں اور یہاں اس سرزمین کے حقیقی لوگوں کو کوئی حق نہیں مل رہا ہے۔ لیبر پارٹی سے تعلق رکھنے والے تل ابیب کے میئر نے اس بات کا اعتراف کیا کہ ہم فلسطینی عوام کو اس صورتحال میں اسی طرح باقی نہیں رکھ سکتے – ان کا کہنا تھا کہ یہ نہیں ہوسکتا کہ ہم ان کی سرزمینوں پر قابض بھی رہیں اور ان سے کسی قسم کے ردعمل کی توقع نہ کریں۔

انہوں نے کہا کہ صورتحال اسی وقت تبدیل ہو سکتی ہے جب اسرائیلی حکومت آس پاس کی حکومتوں کو یہ باور کرائے کہ وہ حقیقی معنی میں صلح چاہتی ہے۔

تل ابیب کے میئر کا یہ بیان ایک ایسے وقت سامنے آیا ہے جب صیہونی حکومت نے اوسلو معاہدے سے لے کر اب تک جتنے بھی معاہدے ہوئے ہیں کسی پر بھی عمل نہیں کیا ہے اور اس نے اقوام متحدہ کی قراردادوں کا ہمیشہ مذاق اڑایا ہے ۔