(فلسطین نیوز۔مرکز اطلاعات) فلسطینی صحافتی حقوق پرنظر رکھنے والے ادارے کی جانب سے جاری ایک بیان میں بتایا گیا ہے کہ فلسطینی صحافیوں کے حقوق کی سنگین پامالیوں کا سلسلہ جاری ہے۔ مئی میں اسرائیلی فورسز نے صحافتی حقوق کی 17 بارپامالیوں کا ارتکاب کیا۔
فلسطین نیوز کو موصول ہونے والی اطلاعات کے مطابق صحافتی حقوق پر نظر رکھنے والے ادارے’’مدیٰ‘‘ کی جانب سے جاری کردہ بیان میں کہا گیا ہےکہ اگرچہ اپریل کی نسبت سے مئی میں اسرائیلی فوجیوں کے ہاتھوں صحافتی حقوق کی پامالیوں میں قدرے کمی آئی ہے مگر یہ سلسلہ اب بھی جاری ہے۔ مئی میں مجموعی طورپر صحافتی حقوق کی 17 بار پامالیاں کی گئیں۔بیان میں کہا گیا ہے کہ مئی میں اسرائیلی فوج کی جانب سے اسرائیلی مظالم کے خلاف احتجاج کرنے والے فلسطینیوں کے مظاہرے کی کوریج کرنے والے پانچ صحافیوں کو گولیاں مار کر زخمی کیا گیا۔
مئی میں صہیونی فوجیوں نے ایک صحافی اور صحافت کے شعبے میں انٹرن شپ پرآئے طالب علم کو حراست میں لے لیا۔
صہیونی فوجیوں نے کئی صحافیوں کو احتجاجی مظاہروں اور ان پر وحشیانہ طاقت کے استعمال کی کوریج سے سختی سے روکا۔ ان کے کیمرے توڑے گئے، سامان چھینا گیا اور دو صحافیوں کو بیرون ملک سفر سے روکا گیا۔
خیال رہے کہ اس وقت اسرائیل کی جیلوں میں کم سے کم 20 فلسطینی پابند سلاسل ہیں۔ ان میں سے بیشتر پر اسرائیلی فوج کے خلاف میڈیا پر اکسانے جیسے الزامات عائد کیے گئے ہیں۔